مغربي حر
حبك يا بلادي سْرى و جْرى ف الشريان
بصدري نحميك من عدو و لو يجي و ف يدّو مكاحل
مغربي حر كيف سور ف صاد العديان
هكذا عرفونا اقحاج و جميع المغاربة فْطاحل
صُلنا صولات بين تُرك ، عجم و رومان
براية وحدة ف الجّبال و صحرا و سْهول و السواحل
ب زْئير اسُود ما زال صداه ف الميدان
سمعو القريب و البعيد و ما ناكر ذا الا الجاهل
لكن اليوم الأْدى جانا من جيران
و الجار يلا كان غافل جاهل تعود فيه واحل
ما جانا شهم ما لبس لباس الشجعان
ينثر سْموم من بعيد و ما صَبْنا حيلة وْ لا حل
و طار السم وسط داري و قاس الاخوان
و السم يلا سْرى ف دم ياكل الذات من الْداخل
نْصيحة لَلْخو كان خايَن وْلا خوَّان
را المغربي رزين فاهم عايق و ما بقاش ساهل
ما عاد يتيق بالدموع و شْعار البهتان
حنا ف الساحة صادكم و اللي عيا فينا يروح راحل
را حب بلادي سرى و جرى ف الشريان
بصدري نحميه من عدو ف الخارج و من عدو الداخل
بقلم يزيد العلوي الإسماعيلي
تعليقات
إرسال تعليق