حمو و لالة هدي
الراوي
قصة حمو شكل بهمو
لالة هدى مهبلاه
كيف الناݣة صايݣاه
حمو بظرافتو معاها
و هدى تعطيه بالݣفا
حمو قروي قليل يدوي
رابط لسانو ف فاه
بالكاد تسمع لو لغاه
و لالة هدى بنت المدون
ديما ريّو مخالفة
حمو مربوط في هواها
لكن هي ما معبراه
قدام الناس حاݣراه
طية ݣلبو اللي بغاها
يمشي عاري و بالحفا
من يوم ماجابها لدارو
و هي المحنة تابعاه
غادي و الضحكة وراه
قدام اهلو و كذا جارو
نهار و ليلة مطايفة
ديما غانس عليه قبو
و مغطي راسو جواه
مفهوم و زينها عماه
ديما مطوي على جنابو
و يماه عليه خايفة
ام حمو
انا هنية ام حمو
و بين يدييا مربياه
و حليب صدري مرضعاه
هو ديما قريب ليا
جات هدى له خاطفة
لقاتو مسكين غير نية
بير و لا زال لو غطاه
رمات سطلها مصيداه
و حبال دلوها عصية
ف اطراف البير واقفة
كيف العقرب سمماتو
و حتى ترياق ما شفاه
و لا شي راقي رقاه
خايفة من سمها يقتلو
را كبدتي عليه راجفة
ولدي حمو ما يهمو
كلامي انا و لا بّاه
عيينل نتحاورو معاه
حاسب كلامنا تفاهة
برد بنظرات ناشفة
ما يتكلم ما يناقش
و بكلمة ما يفوه فاه
صبح ك بكمة مسكتاه
حاول كثير يا سيادي
و نرجى ربي يلا عفا
ام هدى
بنتي هدى كيف وردة
و الزين هي لالاه
زينها من شافو غواه
بنت الاصل يا سيادي
و سخية ف المضايفة
تلبس عصري على الموضة
و السوم ما همها غلاه
ياك باباها اللي شراه
اخر العنقود في ولادي
و العزيز لا لو مناصفة
و حمو من قرية بعيدة
جا رامي علينا بلاه
ما كنت انا رضياه
لكن لبو كان راضي
ونا من حمو ݣانفة
قال يملك ڤيلا جديدة
و شلا أراضي حداه
هدى تنعم بالجاه
نسمع وانايا شريدة
لا حس لا عين شايفة
بعد سبع ايام مشيت عندو
بصفة حماه زيراه
و طريق طويل قاطعاه
ما لقيت فرم لا بهايم
كاذب ب قوال ما وفى
حمو
نهوى هدى و كيف يهدى
قلبي و هي مّحناه
زينها قلبي اللي بغاه
ديما نسعى في رضاها
و نتعامل بالملاطفة
هدى زينة تزين زينة
و لضري هي دواه
عطيتها قلبي و ما معاه
هي تربات فالمدينة
و بالحضارة موالفة
ما كاين زين كيف هدى
لا ف هاذ الجيل لا وراه
فريدة و ما لِها اشباه
لما ننظر في بهاها
فراصي توقف واقفة
و ناس القبيلة حاسداني
يقولو هدى ساحراه
و كلها يهجو ب هجاه
و شي بعضين ݣاع ݣالو
خاد هزيلة و شارفة
بكيد الحاسد ما نبالي
نرمي لغطو مع لغاه
اش سرك بّا مع بّاه
انا لهم ما مسالي
و وذني لهم عايفة
هدى
راجلي حمو تابع امّو
لالة هنية حايشاه
ديما عليا محرشاه
ما قدرت انا على بلاها
و ديما للشر هادفة
هي و لوايسي يدمو
من صباحي يلى مساه
هادشي ما مسانساه
ف الحݣرة عايشة معاها
و من النݣير انا خايفة
كل ما يدخل نريد نشكي
نلقاها داخلة وراه
بكثرة قوال شاداه
و ما نقدر نحكي حداها
ف شكاها محتارفة
لها غي ناب و تآمر
و يا ويل يلا نݣول آه
ينوض الراݣد من ثراه
و يلا من دا نتا تعاني
فليّو و تزيدو دفا
اجي تحلب دوز تحطب
شوفي الغنم في خلاه
هاذشي بزاف واه
طحت معهم ف المصيدة
صغيرة ما كنت عارفة
حمو
لالة هدى يا وريدة
غرامك لقلبي عماه
بلا بالي لما بلاه
ما بقات تحلا لي نزاهة
هموم عليا مصافّة
هدى
كلامك حمو تزاد همو
و انايا ما حاملاه
و ما نطيق ودن سامعاه
ملّيت انا من فعالك
و حتى لظلك عايفة
حمو
يهديك الله يا كبيدة
راه جرحك انا دواه
القلب يحبك عارفاه
علاش عليك بالنكايد
قولي قولة ملاطفة
هدى
لسانك لمّو حلو و سمّو
ملّيتو ما رايداه
و إسم هدى غي نساه
و العقد اللي كان شارك
نعطيه بلا مخاطفة
حمو
بالله عليك يا بنية
رفقي بقليب حارقاه
لسانك بجمر طالقاه
قلبي مكوي بالغدايد
هدى و علاش زاعفة
هدى
القلب المفروق غير طمّو
أنا شدخلني جواه
راه ما نحبو ما نراه
عفاك عطيني براتي
بسلام و بالمساعفة
حمو
يا هدى حني هليا
لا تقطعي لقلبي رجاه
عقلي و نتي ساكناه
راني دونك غير زايد
و عيون عليك دارفة
هدى
عفاك سد فمك زمو
يكفي تحريك الفواه
كذبك انا موالفاه
عمر العين في السواݣي
ما تلقى ماها صفى
حمو
ديما ساكت ما نعاند
و نتي للعيب بادياه
شر المعيور ف الشفاه
و اليوم غا تشوفي عيوبي
و جوابي بالمرادفة
غادي نحكي للقاضي
و نرضى حكمو يلا ملاه
كان لي آمر او ناه
هو من لو مراس ف نزاع
و القاضي يلا قضى وفى
هدى
شير أحمو و دير جهدك
و اللي ما قاد لو سعاه
انتا و الخيبة شباه
غادي نمشي ندير دعوة
و عنوان الدار عارفة
نشكي للقاضي بضري
نحكي امري و ما طوله
نبوح بسري و ما خفاه
نطالب بحقوقي و لازم
ناخد حقي مضاعفة
الحاكي
رينا هدى تجر حمو
لعند القاضي داعياه
بسوء العشرة تاهماه
و هو كعبي ما يسايس
و مصايب له جارفة
من كار لكار غير تالف
و المحكمة ما حداه
و هدى ما هي عاذراه
ما بقى لو وقت كبف يعمل
و الحركة واقفة
ما كان يظن الطلاق واعر
والا في بالو نواه
قطيّط هذا ما شواه
كان يظنو اجراء ساهل
جات افكارو مخالفة
كل ما يجمع شب دراهم
تجي لو دعوة تابعاه
يركب ياخدها معاه
و بعد العودة يجي يسلف
و القهرة فيه جايفة
القاضي يحكم ببراهن
و بذاكشي لي قراه
و حمو شي ما دراه
هدى حاكت لو قضية
و سهود جابت طايفة
القاضي
زيدى هدى آش هذا
شفتك نتي داعياه
كلشي ف اوراق راوياه
قسمي بالله ما تكذبي
و رفعي يمناك حالفة
هدى
هاذي يدي يا القاضي
بكلام الحق رافعاه
بحلف بجاه الله
كل كلمة في مقالي
حقة ما هي زايفة
حمو
راها تكذب يا القاضي
و كلام الحق حاجباه
هي المذوب هاوياه
و لو تعطيها بحورا
ترجع تݣول ناشفة
القاضي
قرب عندي لاش تدوي ؟
و لما نسالك قل آه
فالآن اسكا و انتباه
راني نبحث ف الحقايق
البادي فيها و ما خفى
هدى عندي فالوثايق
- صداقك كلو عطاه
-قبلتي تسكني مع بٌاه
-يخدم و تقابلي الخيمة
-و اللي نتحاو مناصفة
هدى
كنت صغيرة غير نية
يكذب وانا متيقاه
و مشيت مغانرة معاه
يسرح ف الشياه و البهايم
وانا ف الحوش واقفة
ما يكسيني ما يسبط
ديما دربال لابساه
و هو مجلي في خلاه
العيد الناس ف المواسم
و دانا ف دموع دارفة
القاضي
قرّب حمو دوي نفهمو
مالك فاهي و بال ساه
واش صحيح ما حاكياه ؟
هي تحكي و بك تشكي
و باين منّك زاعفة
حمو
كلامها فاضي يا القضي
هذا قالب حايكاه
و كل ما درتو ناسياه
الصدق وراها رماتو
و بكلام كذوب عازفة
من نهار خديتها لداري
و هي ظهري راكباه
ما تفرقني عاللشياه
وانا صابر يا القاضي
و القبيلة ݣاع شايفة
و دابا راضي يا القاضي
تاخد اللي باغياه
راضي بما قضى الله
و اللي سلباتو ف دنيا
غدا ناخدو بالوفى
الحاكي
و طالت لحكام فالمحاكم
و ديما هدى مقاضياه
قدّام قضاة مجرجراه
و حمو مجرور غي تابع
جرحو دامي و ما شفى
خايف تالف ما موالف
و هدى بالكيد رادفاع
و ثوتو ناشف ف الشفاه
ما عاد يفيدو كلامو
لا حين يݣر ولا نفى
و القصة باقية طويلة
لكن الحاكي نهاه
يزيد علوي رواه
جابو عبرة على زواج
يفيد الناس كافة
الزواج نعمة و رحمة
و هو تيسير من الله
نرجاو الخير من وراه
و حدى و حمو غير قصة
و الزمان عليها عفا
يزيد العلوي الاسماعيلي
تعليقات
إرسال تعليق